مدونة ديكستر العبقري

مايو 19, 2008

الراجل مش بس بجزمته .. الراجل برعايته لبيته وأسرته

Filed under: منوعات — dextar3000 @ 8:49 م
Tags: , ,

منذ فترة طويلة وأنا في تعجب مستمر من تركيز البنات على أحذية الشباب، على اعتبار أن الجزمة “الغالية” تعبر عن مستوى اجتماعي راقي، والجزمة “المتلمعة” تعبر عن اعتناء الشخص بأناقته وبأشيائه؛ يعني بيتحمل مسئولية وهيخاف عليها زي ما بيخاف على الجزمة، بس أنا بختلف شوية مع الرأي الأخير علشان أنا بخاف على الجزمة يحسن تتسرق لما بروح أصلي بيها الجمعة في مسجد الأزهر، لكن لو معايا مراتي مش هخاف عليها تتسرق هههههههه
أما الشئ الذي يثير حنقي وسخطي على البنات بشكل عام؛ أنه بينطبق عليهم في كثير من الأحيان المثل القائل: “شحات وبيتأمر“، يعني تبقى الواحدة فيهم مش لاقية صرصار تتجوزوا، ولما يجيلها عريس كويس وابن حلال بس ظروفه زي ظروف شباب اليومين دول، ووضع البلد لا يخفى على أحد، تبتدي تتأمر وترفضه علشان جزمته مش حلوة، وفي الآخر يرجعوا يقعوا في شر أعمالهم ويتجوزوا جدو عنده فلوس ويندموا ويقولوا ياريت اللي جرا ما كان، طب ما كان من الأول .. مش كده ولا إيه.

ماخدوش يا بابا

المشكلة إن ممكن البنت تقابل الشاب الأنيق اللي جزمته متلمعه، فبطريقة أو بأخرى 😉 تقوم بالإيعاز لهذا الشاب بالتقدم لخطبتها (وطبعا أنا مش هحكي هنا عن “الطرق الجهنمية لصيد العريس صاحب الجزمة الذهبية” لأنه مش موضوعنا*) .. المهم .. يروح الشاب المسكين يتقدم للبنت، ويتضح المستور، إنه أساسا معندوش شقة وبمكن كمان معاهوش يجيب شبكة، بس الراجل بيهتم بنفسه ومعتني بجزمته، وفي هذه اللحظة يتقال للشاب حاجة من اتنين: يا إما، ويا إما “ماخودش يا بابا .. ماخدوش يا بابا .. ماخدوش يا بابا”.

الجريمة الكاملة

أنا سامع واحدة بتقرأ التدوينة، وبتقول إيه التخاريف دي .. طيب خلينا يا ستي بخرف، وهنقول إن إنتي كنتي بتحبي الواد مش علشان جزمته، وراح اتقدملك، وأهلك لقوا معهوش يجيب شقة ولا شبكة، والمهر جنيه والباقي مؤخر؛ هل هتقوليلهم وإيه يعني وهتقنعيهم؟ ولا هتقولي “اللي تشوفوا يا بابا” 🙂

حماتك داعيالك

الميزة بقه لو حماتك داعيالك، وإنت دخلت دماغها، في الحالة دي هتشوف الذل اللي عمر أهلك ما شافوه، وهتفضل تضغط عليك، وقد يدور الحوار التالي:

هي: يا ابني طب ما ينفعش تجيب شقة إيجار قديم؟

أنت: منين بس يا ماما، ما أنا لو جبت إيجار قديم مش هينفع أجهز جهاز كويس.

وبعد محاولات مستميته تستطيع إقناعك بإنك تأجل الجواز سنتين لغاية متحوش تاني ثمن الجهاز دون الاستغناء عن أي قطعة ولو من الكماليات.

هي: طيب يا ابني وهتجيب شبكة بقد إيه؟

أنت: ما أنا قلت لحضرتك يا تانت (هي طنط بس بالته، قال يعني بتدلعها) أنا معاييش ثمن الشبكة. وهنا يتدخل والد العروس لأول مرة ليقول لك مخبرا زوجته بحزم يجعلك تظن أنه في صفك: يا ابني الشبكة دي هدية منك للعروسة، وعندما تتنفس الصعداء يستكمل حديثه قائلا: بس إنت مترضاش طبعا يا إبني إنها تكون أقل من بنت عمها (وإلا بقه يا حلو لو طلعت أختها كانت متجوزة [حرامي/تاجر مخدرات/رجل أعمال/ضابط/دكتور تجميل] وجابلها شبكة سوليتير؛ ساعتها واقعتك مطينة، لأن مبنفعش البنت يجيلها شبكة أقل من اللي جت لأختها، فنصيحة لكل واحد عايز يتجوز، اسأل الأول قبل ما تحط رجلك جوه البيت: أختها جاتلها شبكة إيه، بكام).

إنت برضه: طيب وهي بنت عمها جتلها شبكة بكام؟

هو (أبو البنت): بثلاثة آلاف جنيه.

أنت (في سرك): يا ما إنت كريم يا رب.

هي (أم البنت): تلحظ عليك هذا الارتياح، فتفطن بنباهتها لما ورد في ذهنك، وتعاجلك بالقول: بس يا ابني إنت عارف دلوقتي إن الدهب غلي، والثلاثة آلاف جنيه دول ميجيبوش دلوقتي اللي جه لبنت عمها، بص يا ابني احنا بنشتري راجل (وما دام يا حلو سمعت الكلمة دي يبقى اللي جاي كلام مطين بستين نيلة على اللي فكر مجرد تفكير إنه يتجوز) واحنا يا ابني مش عايزين غير سعادتكوا، إنت يا ابني تجيبلها زي ما جه لبنت عمها بالظبط.

إنت (وخوف الأطفال من العفاريت في عينيك): وبنت عمها جالها إيه.

هي (أم العروسة): جالها يا ابني باسم الله ما شاء الله (غويشتين، وأسورة وخاتم ودبلة ومحبس وعقد وسلسلة وأنسيال ومأنسيالش ……………………….. بس).

طبعا إنت لا عارف بنت عمها جالها إيه، ولا عمرك هتشوفها ولا هتشوف شبكتها

إنت: أنا ابن ### وابن #### وابن #### وابن ##### وابن ##### إني فكرت أتجوز، أنا كان مالي ب####### الجواز، يقطع الجواز على اللي عايزين يتجوزا.

بصوت عالي أو في سرك، ده متروك ليك، وأنا مش هعتب عليك في الحالتين، بس يا ابني كلام بيني وبينك، خليهم في سرك أحسن، وكله عند الله.

وربك كبير يا ابني، ومين عارف مش يمكن ربنا يرزقهم بابن الحلال اللي في الصورة اللي تحت دي، اللي يتجوز بنتهم ويقدر يجيب لها كل اللي هي عايزاه.

شاهد الوصلات التالية:

*“You see a lot of smart guys with dumb women, but you hardly ever see a smart woman with a dumb guy.” Erica Jong

Advertisements

اكتب تعليقُا »

لا توجد تعليقات حتى الأن.

RSS feed for comments on this post. TrackBack URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s

أنشئ موقعاً أو مدونة مجانية على ووردبريس دوت كوم..

%d مدونون معجبون بهذه: