نقد سنيمائي .. أوعى وشك

الشخصية المكررة؛ نمط لاحظت أنه متَّبع بكثرة في الآونة الأخيرة سواء في السنيما المصرية أو الأمريكية، ولكن الشخصية في السنيما المصرية بتقع بسرعة والناس بتزهق منها زي شخصية “اللمبي” لأنها شخصية مكررة في كل حركاتها حتى الصوت، بس في أمريكا حتى لما البطل بيطلع في دور كان قايم بدور شبيه ليه قبل كده في فيلم تاني بتلاقي البطل ليه شخصية وطريقة مختلفة عن الفيلم اللي قبله، ده غير إن ده لما بيحصل بكون عدّى على الفيلم على الأقل من سنتين لثلاث سنوات، مش زي عندنا يادوب بتلحق تعدي سنة.

المشكلة إن النمط ده بدأ يتكرر مع نجوم كتير بعضهم دخل السنيما من باب الغناء زي تامر حسني ومصطفى قمر، وده هيخللي الناس تزهق منهم مع إن بعضهم قدم فيلم رائع وهو فيلم عصابة الدكتور عمر، بس أكيد الواحد مش مستعد يدخل فيلم فيه نفس الشخصية دي لأن حلاوتة الشخصية بتزيد أكتر لما تكون أول مرة وبشكل جديد.

...morgan-ahmed

لكن ده مش حال كل أفلام السنيما المصرية، يعني عندنا مثلاً أفلام الفنان الكبير عادل إمام اللي كل شخصية في أفلامه مختلفة تماما عن الفيلم اللي قبله، يعني مثلا شخصيته في فيلم “حسن ومرقص” مختلفة عن شخصيته في فيلم “مرجان أحمد مرجان” اللي طالع فيه بدور رجل الأعمال الفاسد اللي بيعرف يخلص كل أموره بالفلوس، وحتى عرف يشتري الواد بتاع أسرة نور الحق اللي المفروض إنه متدين، وده معناه إن يقدر يصدر أي قوانين ويعمل اللي هو عايزه في البلد تمام زي ما خد جائزة أحسن شاعر عن ديوان مش هو اللي كاتبه لأ وكمان مينفعش يكون شعر، واللي ما شافش الفيم يقدر ينزله من الرابط ده، ومتنسوش تقولولي رأيكوا في الفيلم المصري “مرجان أحمد ..” بطولة الفنان عادل إمام ونخبة من كبار الفنانين المصريين.